ANTONIO FERNÁNDEZ MORALES, O CANTOR DO BIERZO (Biografía inicial)
Foto de Antonio Fernández Morales recuperada do álbum familiar dunha tataraneta (María de los Ángeles Fernández- Garayzábal) por Henrique Costas para lograr a difusión da súa imaxe. |
Antonio Fernández Morales naceu en Astorga un 17 de setembro de 1817 mais viviría a súa infancia en Cacabelos no medio do xardín berciano lugar ao que permanecerá ligado de por vida e onde morrerá un 15 de agosto de 1896, ademais de repousar no seu cemiterio. O seu pai Tomás Fernández Garrido, boticario de profesión e de ideas liberais e a súa nai Nicolasa Morales Rodríguez, de costumes máis conservadoras, procuraron unha educación singular á que as circunstancias e singularmente O Bierzo e as súas xentes ían engadir un elemento substancial para facer del un autor destacado, un dos primeiros en recuperar para a escrita no ano 1847 o que el denominou dialecto berciano, en realidade un subdialecto do galego oriental como el mesmo recoñece no prólogo da que será a súa obra literaria máis destacada: Ensayos poéticos en dialecto berciano editada en León capital en 1861.
Coñezamos máis polo miúdo as distintas etapas da súa vida
e o contexto da súa creación literaria seguindo os datos que ten aportado o seu
biógrafo José A. Balboa de Paz responsable, en gran medida, da incorporación
definitiva de Morales ao elenco de autores bercianos. A biografía que Balboa
editou no ano 1986 abriu un proceso de restablecemento que non parou de medrar
e mesmo provocou que se sumasen destacados estudosos centrados xa máis na súa
repercusión lingüística e literaria o que permitiu que, en eventos posteriores
(como o seu recente bicentenario) tanto a biografía como outros traballos sobre
o autor ampliasen considerablemente os coñecementos sobre esta figura
transcendental da literatura do Bierzo.
Astorga no século XIX |
DE
ASTORGA A CACABELOS: O NACEMENTO E A PRIMEIRA FORMACIÓN
Antonio Fernandez Morales naceu en Astorga e foi
bautizado na parroquia de Santa Marta. Era de familia fidalga e polo tanto con
recursos e propiedades. Seus pais eran astorganos ao igual que os seus avós
maternos, pero o seu avó paterno, alcarreño, no 1817 residía en Ponferrada
exercendo de boticario. O seu pai rexentaba tamén unha botica en Astorga e estaba
casado con Nicolasa coa que terá tres fillos, o maior será Antonio.
O noso autor viviu ata os cinco anos de idade na capital
maragata. Tras o Trienio liberal, Tomás Fernández Garrido vese obrigado dalgún
xeito a marchar de Astorga a causa das súas ideas políticas (era membro da
sociedade secreta dos Comuneros de Castilla) e para evitar ser
apresado polos realistas decide fuxir. Exercera en Astorga como
concelleiro en varias ocasiois e denunciara diversas agresiois a persoas de
talante liberal e progresista.
A familia decide instalarse en Cacabelos en 1824, onde
Tomás logra mercar unha farmacia e Antonio vivirá desde os seis anos. Aprenderá
eiquí a lingua que se fala no Bierzo nese proceso natural de socialización
propio dun nino, que a pesar de recibir as primeiras letras en castelan
escuitouna á vez que medraba e logo xa adolescente interacciona coas xentes do
común que tiñan na boca este dialecto oriental do galego como lingua materna.
Precisamente el mesmo recoñece xa en 1847 cal foi o seu proceso de achegamento
ao galego:
... estou
ocupao en buscar noticias ou escritos d’aquesta sierga y en vano, pois nin unha
carta escrita así puden precurarme; pero non ó creyo necesario para complacer á Uste, porque criyao dende nino n’este pais, préciome
de poseyer seu lenguaxe, n’ostante de costarme ya algún traballo falalo y
escribilo...
Instalados
en Cacabelos na rúa Cimadevila desde 1825 onde alugan unha casa. A súa nai,
ademais da escola de Primeiras Letras, levábao ao santuario nas beiras do río Cúa para rezar con
fervor, como logo escribirá Morales no seu poema á Virxe da Quinta Angustia.
Antonio volverá
a Astorga en 1832 para estudar tres cursos no Seminario un lugar de referencia
para o liberalismo daquela ao coincidir estes anos convulsos tras da morte do
rei absolutista Fernando VII (1833) coa dirección do bispo catalán Torres Amat
de dito seminario. De Astorga partira
para a universidade en Valladolid o ano anterior Enrique Gil, logo non puido
coñecelo nesta ocasión, pero si tratar con outros destacados persoeiros
bercianos e valdeorreses polo que o contacto co galego falado puido seguir existindo
ademais de manterse, claro está, en Cacabelos nos períodos vacacionais.
Na
beira do Cúa namentres seu pai conservaba as súas ideas liberais e sóuboas
legar ao fillo que con dezasete anos sabemos foi nomeado sarxento da Milicia Urbana de Cacabelos iniciando así os seus pasos decididos na
carreira militar e afianzando os contactos con personalidades do liberalismo
berciano como Antonio Ojeda.
Un último dato sobre Cacabelos antes de proseguir. Tomás Fernández non tardará en facerse cunha residencia propia nesta vila. Será en 1836 aproveitando a Desamortización dos bens do Mosteiro de Carracedo, a pesar de que logo pasará a vivir toda a familia a Vilafranca en 1837. Esta casa será a vivenda onde morrerá o pai do autor un 2 de xuño de 1857 e posteriormente o propio Antonio.
Santuario da Virxe da Quinta Angustia (Cacabelos) |
DE VALLADOLID A GALICIA: A CARREIRA MILITAR
En
outubro de 1835 solicitou o seu ingreso no Colexio de Distinguidos de
Valladolid co aval da Guardia Nacional
de Cacabelos á que pertencía. En xaneiro do 1836 iniciará o curso, despois de
superar unha proba de ingreso. Rematará a súa formación en 1837 co grao de
subtenente que axiña ascenderá a tenente tras levar a cabo distintas acciois
militares no Rexemento de Infantería Borbón nº 17 do Exército do Norte. Como
eran os tempos das Guerras Carlistas pasou por Pedrafita, País Vasco, Navarra,
Aragón, Cataluña e Levante. Participa na toma de Morella en 1840 e a de Berga
1841, volve pois a Cataluña e logo a Navarra antes de recalar por maior tempo,
case cuatro anos, en Galicia que podemos considerar o seu destino máis
duradeiro. Reside do 1842 ao 43 en Tui e despois na Coruña onde participa do
Alzamento progresista de agosto do 43 polo que pasa á reserva durante todo o
ano seguinte para recuncar no batallón provincial en Tui ata outubro de 1845.
Esta
etapa é a que de menos datos temos por non aparecer noticias dos seus contactos
literarios e intervenciois noutros ámbitos máis aló dos militares, pero non cabe
ningunha dúbida pola súa ideoloxía liberal e progresista de que Fernández
Morales participou ou tivo constancia daquela do que denominamos o Provincialismo, un movemento político
e intelectual de reivindicación da identidade e da dignidade de Galicia na
procura dunha administración propia que permitise un desenvolvemento social,
económico e cultural que dá os seus primeiros pasos no 1840 e é precursor do
galeguismo. Este activismo contra o goberno moderado de Narváez terá como
momento central o pronunciamento de abril de 1846 e a posterior matanza dalgúns
dos seus dirixentes, os Mártires de Carral.
Casa dos Fernández Morales en Cacabelos tras colocar a placa que o lembra no ano 2011 |
DE VILAFRANCA A LEÓN: ETAPA DE CREACIÓN
LITERARIA
Esta
etapa ten como precedente destacable a intensa actividade política e cultural
do pai de Fernández Morales motivo principal do paso da familia de Cacabelos á
vila considerada capital do Bierzo. Ademais de se presentar ás elecciois en
1837 e de 1839 coa intención obter un cargo de deputado a Cortes, algo que non
logra. Aínda así en 1842 está entre os 18 homes máis representativos convocados
pola Corporación para restablecer de novo a Provincia do Bierzo. Por outra
banda, non só conseguirá situarse el na
lista de socios fundadores da Sociedad de
Teatro de Villafranca en xaneiro de 1843 senon tamén colocar ao seu fillo despois
do escritor Enrique Gil e o avogado Joaquín
del Pino entre os honrosos socios
corresponsales como o político
Pelegrín Saavedra, o pintor Lorenzo Fuertes ou o letrado cacabelense da
Audiencia da Coruña Manuel Cardeña, o que describe à
perfección os intereses que moven tanto ao pai como ao propio Antonio.
Efectivamente
Morales vai pasar en Vilafranca unha tempada na vila en calidade de capitán na
reserva á espera dunha nova praza definitiva e consecuencia, como el mesmo
recoñece de sus opiniones políticas. Este
tempo libre dedícao á creación literaria como puidemos saber a raíz da aparición
da súa correspondencia con Mariano Cubí, un eminente filólogo catalán que,
aproveitando as súas viaxes de presentación da súa obra frenolóxica, contacta
en 1847 con Antonio para invitarlle a escribir en dialecto berciano. Foi
contacto epistolar (que non persoal, poida que propiciado polo seu pai, xa que
Cubí pasou polo Bierzo cuando Antonio non estaba na vila). Esta relación
prodúcese, unha vez máis, como resultado da afinidade ideolóxica, cousa que
evidencian as propias cartas (Silveiro 2017).
Temos constancia
de que ademais dun conxunto de poemas en galego berciano, Antonio realizara con
anterioridade varios textos teatrais en castelán dos que envía un a Madrid para
probar fortuna. A valentía e fidelidade coa que procura abordar a empresa coa
que o amigo e prestixioso filólogo catalán lle engaiola será fruito dun labor
pausado e inxente de Morales que verá a luz anos despois noutro momento no que
os seus deberes como militar de carreira lle permitiron preparar a súa edición.
Non podemos deixar de indicar un par de cuestiois ao respecto. Antonio é
consciente da súa ousadía á que se ve obrigado dada a inexistencia de textos
escritos nesta lingua dos bercianos, sabedor da súa pertenza ao galego, do que
é un subdialecto, e coñecedor do galego usado polos galegos na fala,
seguramente tamén lector dos poucos textos que circulaban por Galicia nese
idioma (entre os que estarían os creados polo Padre Sarmiento no século XVII,
pero que se editarán por vez primeira nos anos cincuenta do XIX).
A comezos do ano
1849 volve a súa actividade no exército en Madrid ata que no mes de agosto foi
enviado a Italia nunha curiosa operación de defensa do Papa. Ao seu regreso
pasa por Barcelona (o seu biógrafo, Balboa de Paz, apunta que talvez daquela puido
coñecer en persoa a Mariano Cubí ou quizás máis tarde noutra licencia temporal
do 1854, de cuatro meses, que pasa na cidade condal). Entre estas datas ao seu paso por Valladolid
(1852-53) debeu coñecer a que sería a súa esposa, Dátiva Manglano Verdesoto coa
que terá posteriormente dous fillos (Alfredo e mais Etelvina).
Tras do pronunciamento de Espartero que conduciu ao Bienio Progresista ao que se adheriu Morales, logra o grao de comandante de infantería e comeza un período de varios anos (1858-1866) en León capital, con frecuentes estancias no Bierzo, algúns en situación de reserva. Lembremos que no ano 1857 morre o seu pai en Cacabelos tras deixar a vila do Burbia un ano antes. Na capital leonesa ocupou distintos cargos (inspector de Estatística, secretario do goberno militar da provincia) que lle permitirá de novo activar a súa faceta cultural e literaria como queda constancia nas numerosas composiciois e críticas que ven á luz na revista El Esla e onde se anuncia en 1860 a publicación inminente dos seus Ensayos Poéticos en dialecto berciano que se editan na mesma imprenta. Os Ensayos foron distribuídos ademais dos lugares habituais a onde chegaba a revista leonesa a varias librarías de Barcelona a instancias de Cubí e, algo moi interesante, estivo a dispor dos lectores en distintas vilas de Galicia. Precisamente é necesario reparar na repercusión deste poemario no contexto galego para entender cal foi a contribución do noso autor ao movemento literario que se denomina Rexurdimento.
Fernández Morales (sentado á dereita) nunha reunión de amigos na súa casa de Cacabelos (foto cedida por J.Antonio Balboa o seu biógrafo) |
MORALES
PROGRESISTA REPUBLICANO: O BIERZO SEMPRE COMO REFERENCIA
Ábrese unha
etapa final na vida de Morales a partir do ano1866 na que deixa León para
residir en lugares dispares nos que prosegue a súa carreira militar e política
(Illas Baleares, Granada), pero será en Málaga onde participa de xeito notable
en acciois bélicas na revolta da Gloriosa de 1868 que dá ao traste co goberno
da raíña Isabel II. Ascende a coronel e logo chegará a gobernador militar de
Toledo en 1870 e máis tarde de Granada. Estamos no Sexenio revolucionario no
que dá un salto á política. Foi elixido deputado presentándose no Partido Radical polo distrito
de Vilafranca do Bierzo en 1872. O feito que represente á comarca supón unha
proximidade evidente cos intereses das súas xentes. Nunca perdeu de vista a
comarca berciana. Pero tras combater no ano 1873 na zona norte na segunda guerra
carlista, por motivos de saúde pasa a retagarda e vai ser nomeado ao ano
seguinte gobernador mitilar de Toledo onde pasará un tempo e no que vai editar
o seu segundo libro de poemas, desta volta en castelán: Ensayos poéticos (1876)
unha especie de antoloxía de toda a súa obra mesmo recreando e retocando ao
pasar ao idioma cervantino alguis dos poemas dos seus Ensayos poéticos en dialecto berciano. O valor literario, e por
suposto, lingüístico, do segundo libro resulta menor que o anterior.
Co seu paso á reserva en 1883 traslada a súa residencia habitual a Madrid realizando frecuentes visitas ao Bierzo. Na vila do Cúa en 1893 atopámolo coa súa muller onde outorgan testamento aos seus dous fillos Alfredo e Etelvina. Morales comeza a percibir achaques propios da idade, que non rematarán coa súa vida ata tres anos máis tarde. Morre en Cacabelosaos 79 anos de idade un 15 de agosto de 1896 e será soterrado no cemiterio da Edrada ao día seguinte, onde aínda hoxe podemos visitar a súa tumba, unha das máis vellas e emblemáticas do camposanto cacabelense.
Tumba de Antonio Fernández Morales (2017) |
A partir do ano 1996 foron muitos e mui diversas as ocasiois nas que no Bierzo se organizaron actos centrados na vida e especialmente no 2011, 150 aniversario da publicación da súa obra Ensayos poéticos en dialecto berciano, ademais do bicentenario do seu nacemento no ano 2017, todo un proceso de recuperación da súa figura e da súa obra que segue medrando porque a trnascendecia do cantor do galego no Bierzo vaise abrindo paso non só na comarca, senón tamén fóra dela.
Engadimos un par de referencias bibliográficas de interese para ampliar datos sobre a súa biografía:
- Antonio Fernández Morales: unha revisión biográfica, de J. Antonio Balboa de Paz (2017)
Comentarios
Publicar un comentario